Amourète

Ayîr èt audjoûrdu

I . C’èst par one bèle swèréye d’èsté,
Qui d’astchèyance s’ont rèscontré
Twènète èt Zande.
Come tot Nameur vineûve choûter
Li grand concêrt qu’èsteûve doné
Au pârc dèl Plante. II. I s’avin.n´ tos lès deûs r’waîtî
L’on-l’ôte dins lès-ouy sins bambî
È r’drèssant l’ tièsse.
Maîs c’èsteûve bin rade po l’ bachî
È sintant leû p’tit keûr touchî
Pa l’ tinre carèsse. III. Dispeûy adon i s’ont r’vèyu
S’ dijant tot bas ou-ç’ qu’i-z-ont p’lu,
Leûs-amourètes
Pwis tot doûcemint i-z-è sont v’nus
Au grand-t-amoûr qu’on n’ disfaît pus,
Zande èt Twènète. IV. Maîs bin rade a ’nn’alé l’ bon timps
Dès rindoz-v’s-î avau lès tch’mins
Èt al maîrîye,
I sont v’nus on djoû l’ keûr contint
Si dîre po d’ bon l’ pus doûs sèrmint
Po tote li vîye. Georges Pelouse (1891-1918) In Oscar Lacroix, La Gerbe sanglante, p. 118-119.…