Come in bribeû qui cache ès´ voye

Résumé

An 1974, pou l' bustokâdje dès Disciples de Saint Eloi di Djumèt qui fièstént leû céquantième anivèrsêre, Robêrt Arcq s'a mîs a dalâdje pou scrîre çu qui s'ra quéqu'fîye ès´ mésse bèsogne, Èl Mèsse di no Payis.

Il-a d'mandé a Piêre Leclef, ôrganisse èt compôsiteûr, d'awè sogne dès pârticions èyèt ç'ti ci a pârti di nos vîs-ér´ walons pou fé sès musiques. C'èst l' Royal Cercle choral Saint-Armand d' Juprèye, ène soce di preumiêre fôce qu'a stî priyîye dè l' tchantér.

On-a ètindu l' mèsse pou l' preumî côp a l'Èglîje di Djumèt Chef-lieu èt on l'a tchantè pus d' dîs côps ç'n-anéye la. Adon, on-a d'mandè a Robêrt Arcq dè l' candjî ène miyète pou qu'on l' tchante dins dès sales di concêrt, èyèt ç'a stî présintè èl 9 nôvambe 1975 pou l' preumî Festival de Musique wallonne de Jumet.

Pou l' côp, Rôbert arcq aveut scrît dès powèsîyes pou lès mète intrè lès tchants èy' il-aveut fét v'nu tous lès tèkses dins-in p'tit lîve, Mèsse di no Payis. Poésies. An 1979, il-a co rajoutè saquants powésîyes èt c'èst d'vènu Come in bribeû qui cache ès´ voye.

Èl Mèsse di no payis a yeû in fameûs sucsès ; èle a stî tchantéye pus d' cint côps a Lîdje, a Paris pa dès soces fôrt conûwes ; on l'a minme arindji pou dès fanfâres ; on l'a minme mîs an picârd, an namurwès, an lîdjwès… Tous l's-ans, on l' tchante co a Châlèrwè, pou lès Fièsses di Walonîye.

Sins r'lache, Robêrt Arcq s'a r'mîs al bèsogne, marchôdant fét-à-fét´ sès tèkses èyèt s' cous´ Jean-Pierre Clovin a boutè avou li pou fé ène Mèsse di no vilâdje èy' avou èn-ôte du sès soçons, Gaspard Masuvyarobona, il-a ètèrprîs l' Mèsse pou nos djins.

Mins Robêrt Arcq èn´ s'a nén co djokè ; il-a mîs an walon l'Ordinaire de la messe qu'a d'vènu, quasimint sins candj'mint, èl cén qu'a stî chwèsi pa l'Union culturelle wallonne.

Dins ç' lîve ci, nos-avons rachènè lès powèmes di Come in bribeû qui cache ès´ voye, come Robêrt Arcq lès-aveut rarindji tout djusse divant d'è dalér, èt nos-avons mîs a môde di rawète saquants tèkses qu'avént d'meurè dins sès papîs : quate tchants dèl Mèsse pou nos djins èt trwès powèmes qu'il-aveut scrît pou l' batème si sès p'tits-èfants.

À propos de l'auteur