Istwere : djusse divant l’ fén di l’ URSS: Tchanteu d’ rok a Vladivostok
Vladimir Kousmin a dandjreus stî li prumî tchanteu rok e l'URSS. E Noyé 1988, il est priyî pa les Amistés beldji-sovietikes a vni tchanter ezès hales di Skerbek. Il aveut stî amoenné a Brussele pa l'avion d' l'Areyoflote do vénrdi. Si concert aveut stî on succès, divant l' minisse del culteure, et... Françwès Hascher nosse mambor [agent]. Vos fåt dire ki, adon, dj' aveu tot fwait mes scoles di droet po continter m' pa, mins dji n'aveu nole håsse di passer m' veye emey les noerès cotes. Copurade veyanmint k'on-z aveut amonté ene pitite binde di rok, li « Binde John Lower », avou on tchanteu d' mestî, et nozôtes, des studiants. Vladimir sins toet Mins après l' concert, vo n' la-t i nén ki nos tchanteus rûsses si rtrovèt fén mierseus sol trotwer divant les hales di Skerbek. E l' ivier, sins ene cloutche e leu taxhe, et sins pont d' organizåcion po s' ocuper d' zels. Et l' avion Areyoflote ki-vént n' esteut ki po l' mårdi d' après. C' est Françwès, tcheyou sor zels d' atoumance, k' a fwait do bon Samaritin. Et les priyî di passer ces djoûs la e s' cafè, a Brussele. Et roIa lzî fé schoûter des bindes eredjistrêyes di nost orkesse. Pu, come di djusse, il a stî rinvité e l' URSS. Il î ala e moes d' may 1989. Et c' est insi k' on bea djoû, gn a on telecse del societé « Goose Concert » k' atome amon nosse tchîf di binde. Il î est dit k' on s' doet aprester dåre-dåre po ene tournêye e l' URSS. Dijh-nouv concerts. Et wice e ç' nouzome payis la ? Tot a l' ôte coron : sol cotoû d' Vladivostok, astok des Coreyins et des Djaponès. I n' nos dmoréve ki troes samwinnes po-z awè les vizas. Et por mi s' arindjî avou m' patron, ca adon, dj' esteu bokion dins l' Grand Bwès d' Sougne [Forêt de Soigne]. C' est nén l' tot d' ça. Po cmincî, i nos va faleur evoyî nosse bastrinke : cénk amplis, deus clavîs, nos guitåres et des cenes di rcandje, so si e cas. « Wice est ç', çoula, Vladivostok ? » k' il a dmandé, ståmusse, li dwanî d' Zavemtem. Dandjreus k' c' esteut l' prumî côp k' il oyeut ç' no la. Voyaedje Ene samwinne après, dj' esténs a Moscou. Cwate djoûs, k' nos î avans dmoré. Viziter l' veye avou ene moenneuse, lomêye Natacha. Aler dinner dins les restorants clandestins, la k' gn aveut k' des aparatchniks et nozôtes, après aveur hazé tot on labrin d' colidôrs, po-z avni dins ene såle sins nole finiesse. Pu : Iyouchine Moscou-Comsomoske. C' est èn areyoplane come li 747 da Boyigne. Mins ådvins, ça rshonnéve dipus a èn otobusse come dins « Tintin å Congo », avou les djins poirtant des gayoles ås tcherdins u des pneus d' velo. Pol ratinde, ene minåve cahoute å dbout del pisse. Po nos ebarker, on busse côpé e deus saetchî pa on tracteur. Mins ké tåvlea, tot passant ådzeu del Sibereye, pu å Pôle Nôr, la k' on voeya l' solea dischinde pu rmonter a meynute, sins s' aler coûtchî. Pu 800 km di transsiberyin, a 40 digrés dzo zero ådfoû, et 30 digrés ådvins. Des restorants avou des pompes a l' aiwe di keuve, et do caviår a totes les eurêyes. Vladivostok Ene veye avou djusse des militaires, k' i gn aveut k' cwate moes k' il avént drovou ås civils, a cåze del politike di « clairisté » da Gorbatchev. Ascoyîs a l' otel pa èn oficî del marene rûsse ki nos dit e-n inglès : « Li peupe a dandjî d' vozôtes ». Prumî concert dins on ståde di fotbal. Après onk ou deus bokets – sins balance –, les djins estént efoufyîs come des tchivroûs e moes d' avri. Mågré les håyes di policîs ki waerantixhént li scanfår, les rwaitants ont-st evayi l' terén, et nos rclamer des otografes. I n' avént måy veyou ene binde di rokenrol. Fåt dire k' adon, ene plake di rok a 300 roubes (12000 FB, 300 €), ça rprezintéve on moes d' leu traitmint. Pu ça a stou nosse tournêye, avou deus concerts tos les djoûs, onk a 6 e. et l' ôte a 9 eures al nute. Al fén, Vladimir nos a priyî a on soper d' cwitaedje. On plat d' caviår d' on mete vint di long. Et, par djin : ene dimeye botaye di vodca, 1 botaye di tchampagne di Crimêye, mins seulmint ene dimeye trintche di pwin, ca l' pwin esteut råcioné. Li londmwin, on-z…
N a des passaedjes di l’ Istwere ki les istoryins ni cnoxhèt nén. Paski pocwè…
Eternåcionå: Procès Karadzitch. Del Yougoslaveye al Beldjike
[Ratournaedje : Djôr Staelens eshonne avou Daniel Zink** ] On cåze todi dpus des swè-djhant mançaedjes des Rûsses, des foû grands dandjîs vinant des moslimîs ; on fwait les cwanses ki gn a des margayes etur chiyites et sunites, etur les djwifs et les arabes et tchik et tchak. * Po spepyî tot ça , tapans èn ouy so ene contrêye k’ on î waite tofer so l’ mape po djåzer di batayes etur les kiminåltés. Et foiravant so ene sacwè ki s’ a passé lanawaire : el difén do tribunå po l’ ancyinne Yougoslaveye, fén 2017. Ewaeråcions Les dierins djudjmints sont pacô sbarants, mins les gaztîs n' î voeynut k' so feu, pierdous al dilongue des meyes di pådjes ki les medias classikes ni volnut nén mostrer. Çou ki nos sbare li pus, c’ est pår li djudjmint da Radovan Karadzitch. Çoula coscheut les idêyes k’ ons a ezès payis do Coûtchant, rapoirt a ene pårteye del Yougoslaveye et rapoirt a onk di ses mwaisses, Slobodan Milozevitch, k’ on prind po k’ cea k’ a spårdou bråmint do sonk avår la. Vocial çou k’ est l’ pus ewaerant : Slobodan Milozevitch esteut sconte di l’ idêye des mwaisses siebes bosniakes, ki c’ esteut di taper les Croates et des moslimîs foû del Bosneye. Çou ki Slobodan Milozevitch aveut dins s’ tiesse, c’ esteut d’ wårder so pî li Yougoslaveye, sins l’ idêye padrî s’ tiesse k’ ons a dit d’ askepyî ene « Grande Serbeye ». A on raploû avou Karadzitch et Mladitch, e 1994, Milozevitch derit : « Il fåt ahouwer [mettre à l' abri] tos les mimbes des ôtès nåcions et peupes del Yougoslaveye, et l’ interesse nåcionå des Siebes n’ est nén di taper so les doets des ôtes. » Il a ecoraedjî k’ on bouxhaxhe djus [conclure] li minme acoird politike. Si a-t i critiké ki les Siebes del Bosneye, ki n’ estént k’ on tîce des djins do payis, et ki volént l’ mitan do teritwere. Les politikîs ki rprezintént l’ Serbeye å tribunå d’ El Håye [La Haye] ont ametou les mwaisses des Siebes bosniakes d’ awè cometou des crimes siconte li djintrinnreye [humanité] et d’ awè fwait do schuraedje etnike. Raspepyî l’ cayet Å vey tot çoula, fåreut ki gn euxhe des bates di dvize, et rcweri co la dsu, eyet spepyî des racsegnes k’ ons a yeu pa des gaztîs et tuzeus : Gn a nén fok divins les Siebes k’ i gn aveut des kiminåltarisses, mins eto divins les mwaisses crowates (do foirt nåcionålisse) et dins les bosniakes moslimîs. Metans, dispoy les anêyes 80, onk des tchîfs muzulmans, Alija Izetbegovitch, pretchive po « k’ on rislamijhaxhe les moslimîs ». Houte di çoula, ès pårti politike a xhorbou evoye [éliminé] les corants nén rlidjeus. Come bråmint des estats, li Yougoslaveye aveut des arokes economikes, et rçure des credits des Estats Unis. Waire divant l’ guere civile, ons a stopé l’ buze di cwårs, tot prometant d’ el distoper si on freut des eleccions dins tchaeke republike yougoslåve, et evoyî les rzultats a Washinton. D’ après sacwants analisses, ces djeus la ont stî fwaits esprès po taper l’ hate et l’ hayime etur les republikes. Avou ça k’ les Estats Unis ont aspalé les djihadisses sawoudyins, foiravant e l’ Bosneye. Les medias do Coûtchant ont seulmint hawé siconte des Siebes, måy disconte des Crowates u les moslimîs bosniakes. L’ afwaire do Cossovo Po çou k’ est do Cossovo, on voet co pus clair. Les djins do Coûtchant, k’ avént sititchî les doets ådvins, ont fotou a l’ ouxh les cias ki s’ avént ashidou al tåve po dvizer. Et la, on cåze aprume do politikî ki rprezintéve les Cossovårds albanicåzants, Ibrahim Rugova, k’ esteut sotnou pås djins di s’ peupe, et ki schaerbotéve [se démener] po leus abondroets. Des medias et des « intelos » francès l’ ont discåzé. Å-z arindjî les bidons, les Estats Unis ont co cpité dins l’ copixhî, et s’ mete so les spales des Siebes on djeu [joug] k’ i n’ årént seu poirter. Li nombes des moirts diclårés divins les albanicåzants a stî mopliyî pa pus ki 100 côps dins les medias do Coûtchant (500.000 diclårés, 3.000 vraiys, les bateus ådvins). L’ UÇK (l’ årmêye di schapaedje do Cossovo), aspalêye påzès povwers do Coûtchant, sereut ene soce dislaxhiveuse [indépendantiste], waeraxhe et mafieuse. Houte di çoula, li guere do Cossovo a permetou ås Estats Unis di mete so pî la-djus ene grande båze militåre. Et tchik et tchak. Mågré totes ses flotches, li sistinme yougoslåve fijheut bediver après : ene miete d’ otonomeye politike po les republikes, et les cminåltés wårdént leu tuzance et leu lingaedje, tchaeke a s’ môde. Des dijhinnes d’ anêyes å long, totes ces djins la ont viké eshonne sins må sins rujhe. Ki gn a-t i asteure? Tapans asteure èn ouy å waitrê [spectacle, situation observable] d’ après l’ guere yougoslåve. Pattavå, ou cåzu, c’ est des cminåltarisses ki sont-st å povwer. El Serbeye, c’ est ene forwårdiveuse droete ki moenne l’ estat. Milozevitch a stî replaecî pa Vojislav Kochtunitcha, k’ est sotnou pa l’ eglijhe ortodosse. Cisse-ciale aveut codåné Milozevitch po awè sayî d’ rimete les caetches e for. Mins elle aveut clatchî des mwins po Kochtunitcha prinde les lignroûs ezès mwins (prinde li moennance do payis). E l’ Bosneye, c' est l’ pårti islamiveus da Izetbegovitch ki moenne li danse. Li Crowaceye est foirt nåcionålisse, eyet l’ Cossovo est divins les mwins di côpeus d’ boûsses tchoezis pa leu ptite kiminålté. Douvént ki l’ Coûtchant a djouwé a ç’ djeu la ? Dandjreus paski l’ payis esteut co foû d’ l’ OTAN et do controle des Estats Unis. Ç’ a stî ene cråne ocåzion por zels astaler ene novele båze militåre dins l’ cotoû. Li papî s’ lait scrire I nos fåreut esse pus spepieus å lére les noveles, cwand ça baye des lenes clairmint scrîtes siconte des cminåltés et nåcions. Foirt avant cwand ces scrijhaedjes la vegnnut do minme bos k’ a ddja bouter l’ disdut e l’ Yougoslaveye, e l’ Sireye, e l’ Libeye, e l’ Iran, e l’ Irak et hay vos nd åroz. I fåreut k’ ça nos freut tuzer ås påjhirès voyes po leyî viker les cminåltés divins les estats. Sabaye s’ on vout discotaeyî les pays po l’ amour des cminåltés, tantea k’ i gn åreut pus fok k’ èn estat po tchaeke. Oyi, mins adon, on årè bråmint des payis-bokets, åjheys a mwaistri påzès grandès pouxhances. Ni sereut i nén mî d’ wårder des pus grands payis, nén ezès mwins do pus foirt, la k’ tertos årént leu plaece, ey aprinde li vike-eshonne avou des ôtes ki les cis di leu prôpe tuzance. Tuzer al Beldjike Ça fwait tuzer al Beldjike ki, mågré bråmint des flotches et biestreyes, dimeure ene sôre di ptite Yougoslaveye, avou ene ricnoxhance des rlidjons abagantes, avou troes lingaedjes oficirs, ene otonomeye politike po les redjons et les cminåltés, tchaeke fijhant a s’ môde avou s’ tuzance et ses lingaedjes. C’ est l’ veur ki ci n’ est nén co l’ cas pol walon, li limbordjwès etch., mins pôreut vali k’ les « ptits » lingaedjes d’ amon nozôtes serént ricnoxhous eto ! Asteure, cåzans del rezistance. Å pårt des rcwerances come cisse-ciale, i nos fåreut waitî eto les tuzances et les lingaedjes des vijhéns, ki ça fouxhe des flaminds, magribins, slåves etch. Si les cminåltés et les peupes serént pus près d’ n’ onk l’ ôte, on n’ elzè såreut spiyî po mia ringnî. ** Daniel Zink, e francès dins l’ gazete « Kairos » © Licince GNU di libe…