Djoû d'iviér'

Il-a in-anvè d’ ça
lès cats f’sin’tè la lwa
mès tanincoûp,
v’la l’ coron qu’abaye
dè sès tchîns rinvèyîs.

La ‘yu ç’ qu’on d-a léchî
lès batantes font ‘ne clignète
al piquète.

Nwâr quârt d’eûre ô r’viérs
dès miséres a intinde
maleûrs a ascoutér
d’in monde qui va candjî
ou potète
disparète.

Èl vièye orlôdje muzène ès’ couplèt d’ tous lès tans
bîn staléye ô mitan dè ç’ qu’on loume place dè d’vant.
Vos n’ contèz nîn d’ sur lèye? lèye èle conte, rîn d’ pus seûr
dès s’gondes ‘yèt dès munutes, après, ça s’ra dès-eûres.

L’ quinjène d’in djoû pièrdu
èst payéye in coûp d’ pus.

Èyèt l’ yoûrd cièl fét place
ô stwalî sans-èstwales
nwâr quârt d’eûre su l’indroût
dès batantes qui sè r’clap’tè.

V’la l’ coron qui s’indoûrt dès sès tchîns rapéjîs
c’è-st-ô toûr dès gris cats
dè wardér l’ tans qui passe.

© Dominique Heymans, revue èl Mouchon…